Archives

En ASPANANE aprendemos a entender e resolver conflitos de forma respectuosa

Ao longo de 3 sesións un grupo de usuarios e usuarias de da asociación ASPANANE (Viveiro) participou activamente nun curso de resolución pacífica de conflitos, dirixido a aprender a entender porque suceden os conflitos e formarse en diferentes ferramentas e estratexias para afrontar diferentes situacións conflitivas achegadas a súa realidade cotiá.

O alumnado participante puido integrar a través dunha metodoloxía eminentemente práctica, unha serie de estratexias para aprender a facer críticas de xeito construtivo, comunicarnos asertivamente ou aprender a ser positivo e recompensante coas persoas que nos rodean.

Para xerar estas aprendizaxes  os usuarios e usuarias de ASPANANE desenvolveron diversas dramatizacións que permitiron aprender vivencialmente e a través da observación e análise compartido de cada un dos exercicios realizados.

O grupo amosou unha gran motivación polo curso, valorando moi positivamente todo o proceso formativo  que foi dinamizado e impartido por Arelar  a través dunha formación que FADEMGA ofrece ás entidades que conforman a federación.

 

“Sen saída”: Unha peza de teatro foro que aborda a problemática do acoso escolar

Ao longo da semana pasada, alumnado de 3ºD do IES Pontepedriña efectuou unha serie de representacións da peza de teatro foro “Sen saída”, unha peza que pretende abordar a problemática do  acoso escolar e os impactos que xenera na vítima e na súa contorna inmediata.

Ás sesións asistiron no rol de “espect-actores” e “espect-actrices” o alumnado de 1º de ESO do centro, e puideron participar activamente na reflexión e interacción para abordar a situación de Juan, o personaxe que sofre o acoso escolar e xerar propostas de transformación para mellorar a súa realidade.

O alumnado de 3ºD  construiu esta peza (deseñando os diferentes cadros escena da peza) e preparou a representación ao longo destes meses para xerar un recurso didáctico que permitíu identificar factores de protección esenciais ante o acoso escolar, ou rachar determinados pensamentos errados en torno ao acoso escolar.  Ademais a peza permitía abordar con claridade o valor do punto laranxa como unha ferramenta de utilidade para a protección de potenciais vítimas, e empatizar coa realidade emocional do personaxe principal.

O resultado final foi que tódalas representacións permitiron reflexións moi últiles e enriquecedoras e que permitiron ao alumnado levar a situación de ficción xerada á súa realidade cotiá e reflexionar sobre o rol que cada quen pode adoptar ante potenciais situacións de risco.

Tanto alumnado como profesorado valoraron moi positivamente as diferentes representacións realizadas. Arelar desenvolve a coordinación técnica desta intervención educativa en diferentes institutos de Santiago de Compostela e que é promovida pola Concellaría de Mocidade.

Remata o proxecto EMPATIZA nos diferentes centros de educación primaria de Vilagarcía

Ven de rematar o desenvolvemento do proxecto EMPATIZA para a resolución pacífica de conflitos dirixido a alumnado de 5º e 6º de educación primaria, e que permitiu que a través de metodoloxías participativas e vivenciais mellorar a comprensión do conflito e identificar estratexias de afrontamento baseadas no respecto e a empatía.

O alumnado puido aprender a analizar situacións conflitivas da súa realidade cotiá, establecer estratexias de afrontamento basadas no “todos/as gañan” e vivencialas en primeira persoa con técnicas de dramatización ou establecendo acordos sobre determinados conflitos que axudaron a mellorar ou encauzar conflitos que xeneraban dificultades de relación ou insatisfacción no alumnado.

O proxecto foi moi ben acollido tanto polo alumnado como polo profesorado, dando resposta a unha necesidade moi latente nos centros educativos, para tentar adquirir estratexias de mellora da convivencia e dun afrontamento axeitado dos conflitos dende esquemas de colaboración e/ou negociación.