Ven de presentarse ante os medios o obradoiro “Emotiradio”, unha actividade dirixida a mozas e mozos de 12 a 16 anos, que está concebida como un recurso educativo que emprega o medio radiofónico para facilitar a expresión emocional da mocidade, e que permita expresar inquedanzas, desexos ou opinións en torno as súas vivencias, moi marcadas pola pandemia ao longo deste ano e medio.
O “Emotiradio” é unha actividade que está promovida pola Concellaría de Xuventude e pola Concellaría de Servizos Sociais do Concello de Vilagarcía de Arousa, e pretende ofrecer unha actividade de ocio, ao tempo que ofrece un recurso para a educación emocional dos mozos e mozas de Vilagarcía, permitindo crear un programa radiofónico no formato podcast, ao tempo que desenvolven unha aprendizaxe emocional partindo dos seus propios centros de interese.
O obradioro comeza o 6 de setembro e permitirá á mocidade participante impulsar dun xeito creativo o proceso de construcción do programa de radio, que dará como resultado a creación dun podcast que logo poderá ser escoitado polas persoas interesadas.
Arelar e Laboratorio de Radio desenvolven o “Emotiradio”, como unha das actuacións que están enmarcadas dentro do “Proxecto de Educación Emocional para o afrontamento dos impactos socio-emocionais da pademia na adolescencia” e que está promovido pola Concellaría de Servizos Sociais do Concello de Vilagarcía.
Arelar desenvolve a coordinación técnica deste proxecto ao longo deste ano 2021.
Presentación do Emotiradio en rolda de prensa