Archives

En ASPANANE aprendemos a entender e resolver conflitos de forma respectuosa

Ao longo de 3 sesións un grupo de usuarios e usuarias de da asociación ASPANANE (Viveiro) participou activamente nun curso de resolución pacífica de conflitos, dirixido a aprender a entender porque suceden os conflitos e formarse en diferentes ferramentas e estratexias para afrontar diferentes situacións conflitivas achegadas a súa realidade cotiá.

O alumnado participante puido integrar a través dunha metodoloxía eminentemente práctica, unha serie de estratexias para aprender a facer críticas de xeito construtivo, comunicarnos asertivamente ou aprender a ser positivo e recompensante coas persoas que nos rodean.

Para xerar estas aprendizaxes  os usuarios e usuarias de ASPANANE desenvolveron diversas dramatizacións que permitiron aprender vivencialmente e a través da observación e análise compartido de cada un dos exercicios realizados.

O grupo amosou unha gran motivación polo curso, valorando moi positivamente todo o proceso formativo  que foi dinamizado e impartido por Arelar  a través dunha formación que FADEMGA ofrece ás entidades que conforman a federación.

 

Menores e tecnoloxías: o gran reto das familias

O pasado mércores tivo lugar na casa das asociacións dentro das “Xornadas de prevención das tecnoadiccións nas nosas crianzas”, unha sesión formativa con Anabel Mosquera, pedagoga e formadora de Gestión Plus, que baixo o título “Menores e tecnoloxías: O gran reto da familias” abordou unha análise moi interesante polas situacións de risco que pode haber asociadas ao uso dos diferentes dispositivos, por parte das nosas crianzas,  ao tempo que realizou un percorrido pola situación que nos estamos atopando segundo a idade dos nosos fillos e fillas e a súa relación coas tecnoloxías.

Na segunda parte da sesión, Anabel desgranou a visión preventiva dende o sistema OCLA (Observar, Controlar, Limitar, Acompañar) e que as familias deben de tentar aplicar para desenvolver o proceso educativo en torno ao universo das tecnoloxías coas nosas crianzas.

Á sesión asistiron moitas familias que amosaron unha actitude moi participativa e plantexaron mútiples cuestións a Anabel Mosquera, o que fixo que a sesión fose moi dinámica e interactiva.

Esta sesión forma parte das “Xornadas sobre a prevención das tecnoadiccións nas nosas crianzas”  que son impulsadas pola Concellaría de Mocidade do Concello de Santiago e coa coordinación técnica de Arelar Xestión Socioeducativa.

 

Remata o proxecto EMPATIZA nos diferentes centros de educación primaria de Vilagarcía

Ven de rematar o desenvolvemento do proxecto EMPATIZA para a resolución pacífica de conflitos dirixido a alumnado de 5º e 6º de educación primaria, e que permitiu que a través de metodoloxías participativas e vivenciais mellorar a comprensión do conflito e identificar estratexias de afrontamento baseadas no respecto e a empatía.

O alumnado puido aprender a analizar situacións conflitivas da súa realidade cotiá, establecer estratexias de afrontamento basadas no “todos/as gañan” e vivencialas en primeira persoa con técnicas de dramatización ou establecendo acordos sobre determinados conflitos que axudaron a mellorar ou encauzar conflitos que xeneraban dificultades de relación ou insatisfacción no alumnado.

O proxecto foi moi ben acollido tanto polo alumnado como polo profesorado, dando resposta a unha necesidade moi latente nos centros educativos, para tentar adquirir estratexias de mellora da convivencia e dun afrontamento axeitado dos conflitos dende esquemas de colaboración e/ou negociación.