Archives

Contruimos en igualdade dende a práctica escénica

esta semana ven de rematar o proxecto de educación en igualdade dende a dramatización que Arelar leva desenvolvido no CEIP de Agolada ao longo deste mes de abril e no que participa todo o alumnado de educación primaria do centro.

O proxecto desenvolveuse dende o traballo con 3 grupos de alumnado para abordar a temática da iguladade de xénero, facilitando que o alumnado identificara na súa realidade cotiá situacións de discriminación de xénero.

Este proceso de reflexión grupal inicial permitiu ao alumnado construir situacións vencelladas a realidades cotiáns no patio, situacións referidas aos xoguetes que empregamos ou ao asentamento de diversos estereotipos de xénero que están anclados nunha parte da nosa sociedade e que a través do traballo dende as dramatizacións permitiron ao alumnado deconstruílos e rachar con eles.

Este traballo facilitou que o alumnado puidera identificar comportamentos discriminatoros, establecer solucións concretas, transformando as situacións discriminatorias e promovendo espazos de igualdade entre nenos e nenas , mulleres e homes, ou identificando unha verdadeira corresponsabilidade nas tarefas do fogar.

Ademais houbo unha parte dos contidos específicos adaptados ás idades do alumnado. Deste xeito, co grupo de 1º e 2º de educación primaria traballouse o universo dos contos tradicionais, cheos de estereotipos de xénero, creando contos alternativos dende unha ollada igualitaria.

No caso do alumnado de 3º e 4º e o alumnado de 5º e 6º de educación primaria analizáronse situacións cotiáns da realidade do alumnado (ex. os xogos que desenvolven no patio), para impulsar medidas concretas para transformar eses espazos en lugares construídos en igualdade, modificando algúns comportamentos que podían estar marcados polos prexuízos e os estereotipos de xénero, sendo agora máis inclusivos e integradores.

En definitiva, o alumnado participou dende a motivación e o interese por construir unha realidade máis igualitaria e xusta, promovendo escenarios de igualdade.

Un agasallo perigoso

“Un agasallo perigoso” é o título da peza de teatro foro creada polo alumnado de 1ºD do IES Rosalía de Castro de Santiago, para abordar a problemática do xogo de apostas e a relación dos videoxogos coas apostas, a través da vivencia de Raúl, un adolescente que pouco a pouco vai caendo nas redes da adicción ao xogo de apostas, primeiro mercando loot boxes en videoxogos, e logo adentrándose no mundo das apostas deportivas ate perder o control sobre a súa vida.

Onte a Concelleira de Mocidade do Concello de Santiago, María Rozas, asistiu a coñecer de primeira man o proxecto de Teatro foro que se impulsa nos diferentes institutos de Compostela e puido ver o enorme traballo do alumnado dentro deste proxecto que xorde das teorías do teatro do oprimido de Augusto Boal, e que permite as aprendizaxes de competencias dun xeito moi vivencial e transformador da realidade do personaxe oprimido.

Arelar encárgase da coordinación técnica deste proxecto.

O afrontamento das opresións dende o teatro foro

Arelar está a traballar  nos institutos de Compostela, nun proxecto de intervención socioeducativa ao redor do teatro foro como ferramenta para a abordaxe educativa de diversas problemáticas que afectan dun ou doutro xeito á mocidade. A Concellaría de Mocidade do Concello de Santiago,  é a impulsora do proxecto e no que participan na actualidade 4 institutos de Compostela (IES As Fontiñas, IES Rosalía de Castro, IES Sar e IES Pontepedriña). O proxecto vai dirixido tanto a alumnado de educación secundaria como de FP Básica, e está a permitir abordar problemáticas tan diversas como as drogodependencias, a saúde mental, o consumismo, a adicción ás pantallas e aos xogos de azar e apostas ou o acoso escolar.

O proxecto ten unha compoñente claramente participativa por parte do alumnado, xa que  é o que deseña coa axuda dos e das educadoras sociais, os contextos e as realidades opresoras, sobre as que o alumnado debe de traballar, reflexionar para finalmente transformar.

Este proceso de participación e implicación permite que o alumnado se mergulle na realidade elixida e permite multiplicar o proceso vivencial e educativo ao redor de cada unha das problemáticas sobre as que se traballa no proxecto.

En definitiva, o alumnado traballa ao redor dun proxecto transformador que serve de recurso educativo para a  sensibilización e formación do alumnado para afrontar moitas destas realidades que afectan dun ou doutro xeito ao alumnado Compostelá.