Archives

Contruimos en igualdade dende a práctica escénica

esta semana ven de rematar o proxecto de educación en igualdade dende a dramatización que Arelar leva desenvolvido no CEIP de Agolada ao longo deste mes de abril e no que participa todo o alumnado de educación primaria do centro.

O proxecto desenvolveuse dende o traballo con 3 grupos de alumnado para abordar a temática da iguladade de xénero, facilitando que o alumnado identificara na súa realidade cotiá situacións de discriminación de xénero.

Este proceso de reflexión grupal inicial permitiu ao alumnado construir situacións vencelladas a realidades cotiáns no patio, situacións referidas aos xoguetes que empregamos ou ao asentamento de diversos estereotipos de xénero que están anclados nunha parte da nosa sociedade e que a través do traballo dende as dramatizacións permitiron ao alumnado deconstruílos e rachar con eles.

Este traballo facilitou que o alumnado puidera identificar comportamentos discriminatoros, establecer solucións concretas, transformando as situacións discriminatorias e promovendo espazos de igualdade entre nenos e nenas , mulleres e homes, ou identificando unha verdadeira corresponsabilidade nas tarefas do fogar.

Ademais houbo unha parte dos contidos específicos adaptados ás idades do alumnado. Deste xeito, co grupo de 1º e 2º de educación primaria traballouse o universo dos contos tradicionais, cheos de estereotipos de xénero, creando contos alternativos dende unha ollada igualitaria.

No caso do alumnado de 3º e 4º e o alumnado de 5º e 6º de educación primaria analizáronse situacións cotiáns da realidade do alumnado (ex. os xogos que desenvolven no patio), para impulsar medidas concretas para transformar eses espazos en lugares construídos en igualdade, modificando algúns comportamentos que podían estar marcados polos prexuízos e os estereotipos de xénero, sendo agora máis inclusivos e integradores.

En definitiva, o alumnado participou dende a motivación e o interese por construir unha realidade máis igualitaria e xusta, promovendo escenarios de igualdade.

Un agasallo perigoso

“Un agasallo perigoso” é o título da peza de teatro foro creada polo alumnado de 1ºD do IES Rosalía de Castro de Santiago, para abordar a problemática do xogo de apostas e a relación dos videoxogos coas apostas, a través da vivencia de Raúl, un adolescente que pouco a pouco vai caendo nas redes da adicción ao xogo de apostas, primeiro mercando loot boxes en videoxogos, e logo adentrándose no mundo das apostas deportivas ate perder o control sobre a súa vida.

Onte a Concelleira de Mocidade do Concello de Santiago, María Rozas, asistiu a coñecer de primeira man o proxecto de Teatro foro que se impulsa nos diferentes institutos de Compostela e puido ver o enorme traballo do alumnado dentro deste proxecto que xorde das teorías do teatro do oprimido de Augusto Boal, e que permite as aprendizaxes de competencias dun xeito moi vivencial e transformador da realidade do personaxe oprimido.

Arelar encárgase da coordinación técnica deste proxecto.

O Concello de Santiago impulsa un programa de prevención da adicción ás pantallas

Onte ven de presentarse o programa de prevención da adicción ás pantallas impulsado pola Concellaría de Xuventude do Concello de Santiago e no que Arelar desenvolverá a coordinación técnica do mesmo.

O obxectivo é responder a unha demanda e unha preocupación crecente na comunidade educativa, tanto entre as familias como entre o profesorado e o propio alumnado, a través duns obradoiros que pretenden poñer o foco nas prácticas cotiás do alumnado na súa relación cos diferentes dispositivos e no acceso a internet, para que a partir dunha reflexión crítica o alumnado sexa capaz de adqirir pautas para un uso responsable e saudable das diferentes pantallas e dispositivos.

En último término, o alumnado poderá identificar estratexias e pautas para a autoregulación e o autocontrol no uso de pantallas.

A intervención desenvolverase en 5º e 6º de educación primaria e en 1º e 2º da ESO, coa intención de establecer contidos adaptados a cada nivel educativo. No caso da educación secundaria, terá especial importancia a análise de problemas de convivencia nas contornas dixitais (chatas de mensaxería, redes sociais…) e que poden derivar en situacións de ciberacoso, e nas que se analizará o rol que debe de xogar cada quen, para a protección da vítima e a promoción dunha convivencia satisfactoria.

Os obradoiros desenvolveranse ao longo deste terceiro trimestre e serán impartidos por Arelar.