O Día da educación social (hoxe e os 365 días do ano)

Hoxe 2 de outubro é o Día Mundial da Educación Social, e nun contexto de tanta incerteza e vulnerabilidade como o que estamos a vivir, faise máis necesario que nunca resaltar o esencial da educación social na nosa sociedade.

Esta efeméride permite poñer en valor a educación social como instrumento para afrontar as desigualdades sociais e identificar diversas problemáticas socioeducativas que requiren do apoio ou intervención das e dos profesionais da educación social.

A educación Social permite traballar a prol da inclusión, a igualdade, e a xustiza social, entre outros. Hoxe é o momento de visibilizar  as persoas, os proxectos e  aos colectivos e poñer en valor tódolos días do ano as súas achegas para construir un mundo mellor.

 

 

EMPATIZA: Unha ferramenta para a resolución pacífica de conflitos nas aulas

O proxecto EMPATIZA é unha proposta que xorde da Concellaría de Benestar Social do Concello de Vilagarcía de Arousa, e que vai dirixida ao alumnado de 5º e 6º de educación primaria para promover a formación ao redor das habilidades sociais e o manexo dos conflitos no contexto escolar do alumnado.

Orixinariamente o proxecto establecía unha serie de sesións formativas presenciais nos 8 centros educativos participantes, pero a aparición da COVID-19 truncou o desenvolvemento deste proxecto no seu inicio aló no mes de marzo.

O proxecto EMPATIZA reformúlase neste contexto tan adverso nun material didáctico de apoio para o profesorado dirixido a traballar co alumnado directamente, e que inclúe metodoloxías experienciais para facilitar o proceso de adquisición das diferentes destrezas e habilidades a traballar.

Ler máis…

Ondas cheas de emoción en Arzúa

Os rapaces e rapazas de Arzúa están a desenvolver ao longo desta semana a través do proxecto “Emotiradio” un programa radiofónico onde a educación emocional e a posta en valor das xentes de Arzúa son o eixo central.

O proceso de traballo está dando como resultado a creación do programa “Que onda!!” no que a aprendizaxe emocional nestes tempos tan convulsos derivados da COVID-19 resulta esencial para a adaptación a esta nova realidade que estamos a vivir.

O programa está a crear contidos moi variados como entrevistas a persoal sanitario de Arzúa, reportaxes sobre o movemento asociativo da vila ou expereriencias nas que xente de fóra de Galicia pousou a súa ollada no rural para emprender un proxecto de vida apegado á terra.

Os contos de compoñente emocional e recomendacións de libros para unha aprendizaxe das emocións en familia son algúns dos contidos máis relevantes.

A creación dun programa radiofónico por parte das crianzas ten múltiples beneficios  no desenvolvemento de competencias cívicas, lingüísticas e socioemocionais.

O resultado final do proxecto será un podcast que ademais será emitido en Radio Arzúa.

Ler máis…